ՈՒՍԱՆՈՂՆԵՐԻ ԱՌԱՋԻՆ ՑՈՒՑԱՀԱՆԴԵՍԸ` ՀԱՄԱԳՈՐԾԱԿՑՈՒԹՅԱՄԲ LIVER-Ի
Գեղարվեստի ակադեմիայի ուսանողների` տարբեր կազմակերպությունների հետ աշխատելու փորձը հարստացավ ևս մեկով։ Liver կազմակերպության հետ համագործակցության ծրագրի շրջանակներում կատարված առաջին աշխատանքը «Ալբերտ և Թովէ Բոյաջյան» ցուցասրահում երեկ բացված «Աշխարհը և մենք» ցուցահանդեսն է` կերպարվեստի բաժնի (գեղանկար, գրաֆիկա, քանդակ) 4-րդ կուրսի ուսանողների։
Liver-ն իրականացնում է արվեստի հետ կապված տարբեր գործառույթներ, ինչպես` համագործակցություն արվեստի ոլորտում, արտկոնցեպտի մշակում, ցուցահանդեսների (տոնավաճառներ, աճուրդներ) կազմակերպում, արտդիլինգ, արվեստն ինտերիերում, մասնակցություն արվեստի միջազգային հարթակներում, արվեստի բրենդավորում, պորտֆոլիոյի ստեղծում, մենեջմենթ և այլ։
Ակադեմիայի ռեկտոր Վարդան Ազատյանը նման աշխատանքները գնահատում է ուսանողի` հենց սովորելու ընթացքում կապի մեջ լինելը, առնչվելը արվեստի խնդիրների հետ։ Նա խոսեց աշխատանքի ընթացքի որոշ բարդությունների մասին, որ հաղթահարվել են իհարկե, և որին ներգրավված է եղել նաև ռեկտորը։
«Ցուցահանդեսը կարևոր է նաև այն պատճառով, որ կազմակերպման մեջ ներգրավվեցին մեր արվեստաբան֊ կուրատորները [Անահիտ Ասատրյան, էլեն Ղազարյան]։ Կարևոր է, որ մեր ցուցասրահում ցուցահանդեսները սկսեն արվել կուրատորական աշխատանքով։ Սա առաջին քայլերից է այդ ուղղությամբ։
Բարդ համագործակցության ծրագիր էր, որ արվեց ոչ միայն ակադեմիայից դուրս, այլև ակադեմիայի ներսում»։ Միջուսանողական շփումների, մերձեցումների, ակադեմիայի տարբեր կուրսերի, բաժինների ուսանողների` միմյանց հետ հարաբերվելու, կապեր ստեղծելու, հանդիպումների մասին խոսեց նա, որոնց ընթացքում ծնվում են նոր գաղափարներ, ծրագրեր։
Կատարված աշխատանքի, առաջին նման փորձի տպավորությունների մասին արտահայտվեցին ցուցահանդեսին մասնակցած արվեստաբան Էլեն Ղազարյանը և դասախոս Նարե Սահակյանը։ Եվ դարձյալ ընդգծվեց այն հանգամանքը, որ նման աշխատանքների կարևորությունը ուսանողների` միմյանց հետ աշխատելու փորձն է հատկապես։ Ցուցահանդեսային աշխատանքների հիմնական ուղղվածությունը, ինչպես գրում են Անահիտ Ասատրյանը և Էլեն Ղազարյանը, «Ինչպես են երիտասարդ հայ արվեստագետներն արձագանքում, ինչ անկյուններից են մոտենում ազգայինի և համաշխարհայինի հարաբերության շուրջ խոսակցություններին»։
Liver կազմակերպության տնօրեն Լուսինե Քարամյանը, կարևորելով ակադեմիայի հետ համագործակցության ծրագրի առաջին փորձի այս հաջողությունը, համարեց հետագայում այն շարունակելու վկայություն։ Նա նշեց, որ ցուցահանդեսի բոլոր աշխատանքները` կազմակերպման, համադրման, գրաֆիկ-դիզայնի, թե մեկ այլ, կատարվել է բացառապես ուսանողների ջանքերով, որևէ այլ մասնագետի միջամտություն չի եղել։
Մելանյա Բադալյան
Read More
ՑՈՒՑԱՀԱՆԴԵՍ` «ԳՐԱՆՇԱՆ 23-24»-ՄՐՑՈՒՅԹԻ ՄՐՑԱՆԱԿԱԿԻՐ ՏԱՌԱՏԵՍԱԿՆԵՐԻ
«Գրանշան»-ի միջազգային արտահերթ համաժողովը
Այս տարվա հունիսի 17-ին անգլիական Ռիդինգ քաղաքում կայացած «Գրանշան 23-24» համակարգչային տառատեսակների միջազգային մրցույթի մասնակից «Գրանշան»-ի հիմնադիր, ՀԳՊԱ դասախոս Էդիկ Ղաբուզյանը ներկայացրել էր GHEA Fortune և GHEA Apricot տառատեսակները և արժանացել Ոսկե մեդալի։
«Ալբերտ և Թովէ Բոյաջյան» ցուցասրահի այս ուսումնական տարվա առաջին ցուցադրությունը նվիրված էր այդ հիշարժան իրադարձությանը, որն ամփոփում էր մրցույթին ներկայացված աշխատանքները` ավելի քան 100 տառատեսակի։
Միաժամանակ ցուցահանդեսին զուգահեռ ցուցասրահում կայացավ «Գրանշան» ֊ի միջազգային արտահերթ համաժողովը, որի ընթացքում տեղի ունեցավ մրցանակատվչության արարողություն։ Համաժողովի բացման խոսքը և վարման ընթացքը «Գրանշան»-ի հիմնադրման ակունքներում կանգնած, մրցութային ժյուրիի առաջին անդամներից, բանաստեղծ Գագիկ Խաչատրյանինն էր։
Ելույթ ունեցեղները` Դիզայնի և դեկորատիվ կիրառառական արվեստի ֆակուլտետի դեկան Ավետիք Ավետիսյանը, Համակարգչային գրաֆիկայի ամբիոնի վարիչ Հայկ Փայասլյանը Էդիկ Ղաբուզյանի տարիների մանկավարժական գործունեության, տառաստեղծ մասնագետներ պատրաստելու նրա ներդրումի, վաստակի, նվիրումի մասին խոսեցին։ Մանկավարժ, ուսուցիչ, որի աշակերտները նույնիսկ ձմեռային արձակուրդներին կամավոր գալիս էին ակադեմիա, վարպետը նրանց էր փոխանցում տարիների իր գիտելիքն ու փորձը, հայկական տառի գաղտնիքները։ Արդյունքը ուշացնել չտվեց, նրա ուսանողները բազմաթիվ անգամներ են մասնակցել միջազգային մրցույթների, նրանցից շատերը արժանացել են պատվավոր մրցանակների։
Ավետիք Ավետիսյանը, անդրադառնալով քաղաքային ազդագրերի, պաստառների դիզայնին, դրանցում օգտագործված տառատեսակների անճաշակությանը, բավական խիստ արտահայտվեց։ Հայաստանում կան լուրջ մասնագետներ, ովքեր աշխատում են նվիրումով` ի նպաստ հայկական տառարվեստի զարգացմանը, ստեղծելով տասնյակ նոր տառատեսակներ։ «Էդիկ Ղաբուզյանը ստեղծել է տառատեսակների մի այնպիսի շարք, որի յուրաքանչյուր մասնիկ մշակված է և իսկապես արժանի է քաղաքում տարածվելու և օգտագործվելու»,֊ ասաց նա։
«Անտարես» հրատարակչության տնօրեն Արմեն Մարտիրոսյանը գեղեցիկ մի պատմություն ներկայացրեց հնում ապրած իմաստուն գրագրի մասին. լեգենդը պատմում է, որ նրա ստեղծած տառերը գիշերները դուրս էին գալիս ու պարում լուսնի լույսի պարը։ Մի օր սակայն թշնամին հարձակվում է բնակավայրի վրա, ուր ապրում էր գրագիրը, և նա թողնում, հեռանում է` իր հետ տանելով տառերի գաղտնիքը` խոստանանալով, որ կվերադառնա ու կսովորեցնի այն։ «Էդիկը, կարծես, այդ հին իմաստունի վերադարձն է մեր օրերում։ Հայաստանում միակ մարդը, ով համակարգված և պարբերաբար ստեղծում է հայկական տառատեսակներ։ Նրա տաղանդը միայն հայկական այբուբենով չի սահմանափակվում, աշխատում է նաև հունական, կիրիլիցա և լատինական տառատեսակներով։
Նա մեր օրերի իմաստուն գրագիրն է, որը ոչ միայն պահպանում է հայկական գրավոր խոսքի ավանդույթները, այլև հաղորդում է նոր կյանք` 21֊րդ դարի համատեքստում»։
Դրվատանքի շատ խոսքեր ասվեցին վարպետի մասին, բայց ամենակարևորը, թե ինչպես է նա մտածում և հոգում ընթերցողի մասին, հաշվի առնում յուրաքանչյուր հանգամանք։ Գիրը, ամեն տառատեսակ նա ստեղծում է նվիրումով, յուրաքանչյուր դետալ ու մասնիկ մտածված ու մշակված, որովհետև սիրում է ընթերցողին, սիրում է մարդուն։
Շատ ջերմ , անմիջական ու բարեկամական մտերմությամբ խոսեց Ղաբուզյանի մասին «Գրանշան»-ի նախագահ Բորիս Կոհանը` արժանացնելով նրան պատվավոր Ոսկե մեդալի։
Վարպետի շնորհակալական խոսքը ուղղված էր իր կոլեգաներին, մրցույթի, համաժողովի կազմակերպիչներին, ժյուրիի անդամներին, մրցույթի մասնակիցներին, բոլոր աջակիցներին, ցուցասրահի աշխատակիցներին, ներկաներին։
«Գրանշան» ֊ի անցած ուղին` հիմնադրման` 2008 ֊ից սկսած, այդ տարիներին տարված աշխատանքները, միջազգային մրցույթները, համաժողովները հանգամանալի ներկայացրեց «Գրանշանի»-ի հիմնադիր անդամ Անժելա Պողոսովան։
Տեսանյութով հայ վարպետին շնորհավորական ուղերձներ հղեցին անվանի տառաստեղծ, խմբագիր, գրքի դիզայներ Ջոն Բերրին և գրաֆիկ դիզայներ, «Վրացական տառատեսակ» ասոցիացիայի հիմնադիր նախագահ Նինո Ջիշկարիանին։
Համաժողովը եզրափակվեց Վերոնիկա Բուրիանի ելույթի ուրախ, կենսախինդ խոսքով` մրցույթի, մրցանաբաշխության աշխատանքներին վերաբերող և ավարտվեց մրցանակակիրներին պարգևների շնորհմամբ։
«Հայկական տեքստային տառատեսակներ» անվանակարգում մրցանակները շնորհվեցին Գեղարվեստի պետական ակադեմիայի ուսանող Մերի Ղարիբյանին (1-ին կարգի մրցանակ), շրջանավարտ Արման Հարությունյանին (2-րդ կարգի մրցանակ), Լևոն Չքոլյանին (3-րդ կարգի մրցանակ)։
Ուսանողներ Հակոբ Մալքչյանն ու Աննա Հովհաննիսյանն արժանացել են Բրեինդ ՍՊԸ հանձնաժողովի հատուկ կարծիքի:
«Հայկական ազատ ոճի տառատեսակներ» անվանակարգում մրցանակները տրվեցին ՀԳՊԱ շրջանավարտներ Արման Հարությունյանը (1-ին կարգի մրցանակ), Սյուզաննա Հակոբյանը (2-րդ կարգի մրցանակ)։
Հանձնաժողովի հատուկ կարծիքի արժանացել է ՀԳՊԱ դեցենտ Տիգրան Սոսոյանը:
Մելանյա Բադալյան
Read More
ՀԱՆԴԻՊՈՒՄ ԱՌԱՋԻՆ ԿՈՒՐՍԵՑԻՆԵՐԻ ՀԵՏ
Առաջին կուրսեցիների սպասումները միշտ ավելի են լինում, և կարևոր է, թե ինչպես է նրանց բուհը ընդունում, ինչ մթնոլորտում է անցնում առաջին հանդիպում ֊ծանոթությունը։ Գեղարվեստի պետական ակադեմիան իր ավանդույթներն ունի առաջին կուրսեցիներին դիմավորելու, շնորհավորանք ֊ ուղերձներ հղելու։
Հանդիպումը ուսանողների հետ կայացավ ակադեմիայի դահլիճում` Ուսանողների աջակցման և շրջանավարտների հետ համագործակցության կենտրոնի ղեկավար Ելենա Բայտալյանի ողջույնի խոսքով։
Գեղարվեստի պետական ակադեմիայի ռեկտոր Վարդան Ազատյանի ուղերձը ուսանողներին շատ անմիջական էր` ուղեկցվող երկու կարևոր մաղթանք ֊ խորհրդով, որը կներկայացնենք հոդվածի վերջում։
Ակադեմիայի ուսումնական ընթացքի, կառուցվածքի, ուսանողական ընդհանուր մթնոլորտի, միջավայրի մասին տեղեկություններ հաղորդեցին Ելենա Բայտալյանը և Ուսխորհրդի նախագահ Աննա Գևորգյանը։ Ներկայացվեցին ակադեմիայի կայքը, ֆեյսբուքյան երկու պաշտոնական և ռեկտորի հանրային էջերը։
Շեշտվեց ակադեմիայի որդեգրած ` ուսանողի գնահատման և ազնվության քաղաքականության դերը ուսումնական ընթացքի վրա, որի կարևոր մասը ուսանողի հաճախելիությունն է, հետագայում դրա նկատելի ազդեցությունը գնահատականի վրա։
Որակի ապահովման գործընթացներին ուսանողի մասնակցությունը ենթադրում է կենտրոնի կողմից կատարվող հարցումներին, քննարկումներին, հանդիպումներին ակտիվ արձագանք, հաճախում ֆակուլտատիվ և այլ դասընթացների` այսինքն մասը դառնալու ակադեմիայի ընթացիկ բարեփոխումների։ Ուսանողական խորհրդի գործունեությունը ներկայացվեց ըստ ծրագրերի, նպատակների և առաքելության, խոսվեց նաև միջֆակուլտատային հարաբերությունների զարգացման, տարբեր կազմակերպությունների, թանգարանների հետ համագործակցությունների մասին։ Մինչ այդ Ակադեմիայի պրոռեկտոր Եկատերինա Կաշինան բավական հանգամանալի ծանոթացրեց առաջին կուրսեցիներին տրամադրվող ֆինանսական երեք տարբեր աջակցություններին, խոսեց ուսման վարձավճարների, դրանց ժամկետների մասին` ըստ գործող կանոնների։
Կերպարվեստի ֆակուլտետի դեկան Վահե Գասպարյանը տրամադրված տեղեկություններին հավելեց ուսանողների համար ստեղծված ցուցահանդեսային հնարավորությունը` Ակադեմիայում գործող «Ալբերտ և Թովէ Բոյաջյան» ցուցասրահի կողմից, որի դռները բաց են թե’ խմբակային, թե’ անհատական ցուցահանդեսների համար, նաև միջազգային ցուցահանդեսներին` ուսանողների մասնակցության հնարավորության մասին խոսեց։ Ուսանողների միջբուհական փոխանակման ծրագրերը կներկայացվեն ավելի ուշ։
Առաջին օրվա հանդիպման ամենից ավելի տպավորիչը, կարծում եմ, ուսանողներին ուղղված ռեկտորի խոսք֊ ուղերձի անմիջականությունը պետք է որ լիներ։
«Հիմա այսպես ձեզ նայում ու մտածում եմ` մենք ինչ ֊ որ տեղ նմանություն ունենք այսօր, թեև շատ տարբեր կարգավիճակներում ենք ։ Դուք առաջին կուրսեցիներ եք և ձեր առաջին ուսումնական տարին է սկսվում։ Ես նորընտիր ռեկտոր եմ և էլի իմ նոր, այս կարգավիճակում առաջին տարին է սկսվում։ Ինչ ֊ որ առումով ես էլ եմ առաջին կուրսեցի, թեև բուն ձեր կարգավիճակում ես 27 տարի առաջ էի այստեղ և պետք է ասեմ, որ 27 տարի անընդմեջ սեպտեմբերի 1 ֊ ին գալիս եմ այստեղ տարբեր կարգավիճակներում։
Դուք այսօր Գեղարվեստի ակադեմիա ոտք եք դրել որպես ուսանողներ. ինչ սիրած, կամ չսիրած հայ արվեստագետներ որ ունեք 20 ֊ րդ դարի, որպես կանոն սովորել կամ դասավանդել են այստեղ`Արա Սարգսյան լինի, Հակոբ Կոջոյան, Վարուժան Վարդանյան լինի, թե Սեյրան Խաթլամաջյան։ Դուք այսօր փաստորեն հայ արվեստի պատմության մասն եք դառնում։ Դուք ունեք իրենցից մեկը լինելու հնարավորություն, որովհետև իրենք էլ մի օր ձեր նման նստած են եղել այսպես։ Ես կուզենայի այս գիտակցությունը ունենայիք, որ ամեն օրը, ամեն ժամը, որ այստեղ անցկացնում եք, ոչ ավել, ոչ պակաս հայ արվեստի պատմության կայացման ժամեր են։
… Անգլիայում, որը ֆուտբոլի հայրենիքն է, հայտնի ստադիոն կա` Ուեմբլի, մուտքին մի ցուցանակ կա` «Տեղ, որտեղ խաղացողները մտնում են, բայց դուրս են գալիս լեգենդները»։ Դուք այսօր ունեք այդ շանսը հայ արվեստի պատմության մեջ մտնելու որպես խաղացող և շանս ունեք դուրս գալու որպես լեգենդներ։ Դա ձեզնից է կախված, նաև մեզնից։
Մի բան միայն իմացեք`այդ խաղը հեշտ չի, բարդ է։ Ակադեմիայում և’ դրական, և’ բացասական, ինչպես կյանքում, երևույթներ կան, և դուք բախվելու եք։
Իմ երկրորդ ցանկությունն է, որ դուք ընդունեք որպես ձերը այն ամենը, ինչ ձեզ հետ տեղի է ունենում, նույնիսկ վատը որպես ձերը ընդունեք։ Եթե ընդունեք որպես ձերը, լեգենդ դառնալու շանս կունենաք։ Եթե մերժեցիք, մտածելով, որ սա իմը չի, սա օտար խնդիր է, եկել ինձ է կպել, չէ։ Մարդու կյանքում ինչ ֊ որ լինում է`իրենն է։ Շատ կուզենայի , որ ընդունեիք դա, գիտակցեիք դա, հիշեք և այդպես մտնեք խաղի մեջ»։
Մելանյա Բադալյան
Read More