Արդյունաբերական դիզայն

Հաշվի առնելով հարափոփոխ աշխարհում մարդու կենսակերպի բարելավմանն ուղղված միջոցառումների անհրաժեշտությունը՝ ՀԳՊԱ-ի Արդյունաբերական դիզայնը սովորեցնում է ուսանողներին, օգտագործելով դիզայն մտածողությունն ու ստեղծագործական միտքը, ստեղծել նախագծեր` նպաստելով տեղական արտադրական շուկայի զարգացմանը: Կրթական ծրագրում ներգրավված պրոֆեսորադասախոսական կազմն ուղղորդում է ուսանողներին՝ զարգացնելով մասնագիտական հմտություններ, քննադատական ու վերլուծական կարողություններ, որոնք արտահայտվում են ընթացիկ ու ավարտական աշխատանքներում: Կրթական ծրագիրը պատրաստում է մասնագետներ՝ պահանջված տեղական ու միջազգային արտադրական ոլորտներում:

 

 

Աշխատանքը լաբորատորիաներում

 

Լաբորատորիաներում և դիզայն ստուդիաներում Արդյունաբերական դիզայնի ուսանողներին հնարավորություն է ընձեռնված ստացած մասնագիտական գիտելիքը կիրառել գործնականում. օգտագործելով գծանկարներն ու ճեպանկարները, ինչպես նաև անհրաժեշտ գործիքակազմը՝ նրանք իրականացնում են ամբողջական նախագծեր բացահայտելու աշխատաշուկայի գործնական պահանջները և պլանավորելու հետագա գործունեության շրջանակը:

 

 

Պրոֆեսորադասախոսական և վարչական կազմը

 

Կրթական ծրագրի հաջող և արդյունավետ իրականացումը ապահովում է ոլորտում առաջատար և մասնագիտական որակներ ունեցող պրոֆեսորադասախոսական և վարչական անձնակազմը: Կրթական ծրագրում դասավանդում են ոլորտում երկար տարիների փորձ ունեցող պրոֆեսորներ, մասնագիտական որակներ ունեցող երիտասարդ դասախոսներ, ինչպես նաև աշխատաշուկայում առաջատար կազմակերպությունների ներկայացուցիչներ: Կրթական ծրագրի շատ մոդուլներ անցկացվում են հրավիրյալ մասնագետների և պոտենցիալ գործատուների անմիջական մասնակացությամբ:

 

 

Շրջանավարտները

 

Արդյունաբերական դիզայն կրթական ծրագրի շրջանավարտներն այսօր իրենց գործունեությունն են ծավալում մասնագիտական և հարակից ոլորտներում: Նրանցից ոմանք հիմնել են սեփական գործը, շատերն էլ աշխատում են առաջավոր ընկերություններում ու ստարտ-ափերում:

 

 

Բակալավրի կրթական ծրագիր (4 տարի, 240 կրեդիտ)

 

Արդյունաբերական դիզայն բակալավրի կրթական ծրագրի առաքելությունն է պատրաստել բարձր որակավորմամբ մրցունակ մասնագետներ, որոնք հաջողությամբ գործունեություն կծավալեն արդյունաբերական դիզայնի ոլորտում և իրենց մասնագիտական գործունեությամբ կխթանեն հասարակության լայն շրջանակներում ոլորտի կարևորության վերաբերյալ ժամանակակից պատկերացումների ձևավորումը, ինչպես նաև արդյունաբերության զարգացումը՝ զուգահեռաբար պահպանելով և տարածելով ազգային, մշակութային առանձնահատկություններն ու արժեքները:

 

 

Ուսումնառության վերջնարդյունքները

 

«Արդյունաբերական դիզայն» բակալավրի կրթական ծրագիրը հաջող ավարտելիս շրջանավարտը պետք է.

 

1. Տիրապետի «Արդյունաբերական դիզայն» մասնագիտության ամբողջական բովանդակությանը, ճանաչի և տարբերակի նախագծերի հաջող իրականացման համար անհրաժեշտ՝ միմյանց հաջորդող կարևորագույն գործընթացները և բաղադրիչ տարրերը:

 

2. Իմանա Արդյունաբերական դիզայնի ժամանակակից միտումները, նորարարական տեխնոլոգիաները, արտադրական մեթոդները՝ ըստ նյութերի, կարողանա հետագայում ճշգրիտ սինթեզել ստացած գիտելիքները նախագծման ընթացքում:

 

3. Տիրապետի տարբեր աղբյուրներից տեղեկատվության վերհանման ճիշտ գործիքակազմին և անհրաժեշտ հմտություններին՝ ելնելով առաջադրված կամ ինքնորոշված նախագծային խնդիրների բնույթից, կարողանա քննադատաբար վերլուծել և դասակարգել տեղեկատվությունն՝ ըստ առաջնային կարևորության:

 

4. Տիրապետի տեղեկատվությունը մասնագիտական և ոչ մասնագիտական լսարանին գրավոր, բանավոր ու պատկերային ներկայացնելու հնարավոր ձևերին, կարողանա պաշտպանել ու փաստարկների միջոցով հիմնավորել առաջադրված կամ ինքնորոշված նախագծային խնդիրների լուծման համար ընտրված անհրաժեշտ քայլերն ու գործողությունները:

 

5. Կարողանա գաղափարները ներկայացնել երկտարածական և եռաչափ գրաֆիկական ձևաչափերով՝ կատարված թե ձեռքով, և թե համակարգչային նորագույն ծրագրերով:

 

6. Միավորելով ձեռք բերված մասնագիտական գիտելիքներն ու հմտությունները, ցուցաբերելով ստեղծագործական մոտեցում՝ կարողանա իրականացնել մարդու կյանքն առավել հարմարավետ դարձնելուն միտված և նրա շրջակա միջավայրի նոր պահանջներին համապատասխան նախագծեր:

 

7. Ունենա դիզայներական տարբեր խմբերում աշխատելու հմտություններ և կարողանա հեշտությամբ համագործակցել միևնույն նախագծի շուրջ աշխատող տարաբնույթ ոլորտների մասնագետների հետ:

 

8. Ներկայանա որպես ինքնուրույն, պրոֆեսիոնալ դիզայներ, որն ունի ազգային, համամարդկային մշակութային և մասնագիտական արժեքների հենքի վրա մշտապես զարգանալու պատրաստակամություն` շարունակաբար խորացնելով ընկալելու, վերլուծելու, ստեղծագործական լուծումներ տալու և պատվիրատուների, գործընկերների հետ հմտորեն համագործակցելու ունակություններ:

 

 

Կրթական միջավայր

 

ՀԳՊԱ-ն ստեղծել է յուրահատուկ միջավայր, որը թույլ է տալիս դասավանդումը համակցել գործընկերային ուսուցման հետ, ուսանողներին ցուցաբերել անհատական մոտեցում՝ նպաստելով ներառական պայմանների և ակադեմիական մշակույթի ձևավորմանը:

 

«Արդյունաբերական դիզայն» կրթական ծրագրում ուսումնական գործընթացը առանձնանում է շարունանական, փորձառնական և ինտերակտիվ դասավանդման և ուսումնառության մեթոդներով՝ միավորելով ակադեմիական ավանդականը ժամանակակից մոտեցումների հետ: ՀԳՊԱ-ում ստեղծված են համապատասխան պայմաններ տեսական գիտելիքը կիրառել լաբորատոր պայմաններում՝ աշխատելով իրական նախագծերի շուրջ, որոնք կզարգացնեն ու կամրապնդեն հետազոտական կարողությունները, թիմում աշխատելու հմտությունները, ինչպես նաև ստեղծագործական, քննադական և դիզայն մտածողությունը:

 

Առանձնահատուկ ուշադրություն է դարձվում ինքնուրույն ուսուցմանը, որը նոր հորիզոններ է ստեղծում ուսանողների համար կայանալու որպես անհատ դիզայներ և աշխատելու դիզայնի և արվեստի, ինչպես նաև հարակից ոլորտների տարբեր ներկայացուցիչների հետ:

 

 

Ուսումնական պլանը (2021-2022 ուս. տարի)

 

«Արդյունաբերական դիզայն» կրթական ծրագրի դասավանդումն ու ուսումնառությունը իրականացվում է լսարաններում, լաբորատորիաներում, դիզայն ստուդիաներում: Ժամանակակից տեխնոլոգիական մոտեցումներին ու լավագույն ավանդույթներին ուսանողներին ծանոթացնում և ուղղորդում են պրոֆեսիոնալ դասախոսական կազմը, որոնք համակցում են դասընթացները ոլորտում հրավիրյալ մասնագետների վարպետաց դասերի հետ:

 

 

I տարի

 

Ուսուցման առաջին տարին միտված է ծանոթացնելու մասնագիտության բովանդակությանը՝ ուսանողներին հնարավորություն տալով ձեռք բերել արդյունաբերական դիզայնի վերաբերյալ առաջնային տեսական ու գործնական գիտելիք և հմտություններ:

 

 

II տարի

 

Ուսուցման երկրորդ տարին միտված է խորացնելու և զարգացնելու արդեն իսկ ձեռքբերված գիտելիքներն, ինչպես նաև ձևավորելու և հմտացնելու ուսանողների տեխնիկական մասնագիտական կարողությունները՝ փոխանցելով նյութերի և արտադրական տեխնոլոգիաների վերաբերյալ խորը և համապարփակ գիտելիք և հմտություններ: Այս տարվա ավարտին ուսանողները կիրականացնեն իրենց առաջին նախագիծը:

 

 

III տարի

 

Ուսուցման երրորդ տարին ուսանողներին հնարավորություն կտա զարգանալ որպես թիմային աշխատող: Այստեղ նրանք ձեռք կբերեն արդյունաբերական դիզայների համար կարևոր վերլուծական և հետազոտական գիտելիքներ և կտիրապետեն դրա համար անհրաժեշտ գործիքակազմին:

 

Տվյալ մակարդակը հնարավորություն է տալիս ուսանողին ինտեգրվել աշխատանքային միջավայր, աշխատել իրական շուկայի պահանջներից բխող նախագծերի շուրջ:

 

 

IV տարի

 

Ուսուցման չորրորդ տարում ուսանողները կաշխատեն նախապես սահմանված և առաջադրված ավարտական աշխատանքի շուրջ, որն ուղղորդելու է ղեկավար դասախոսը: Ավարտական տարում ուսանողները կիրականացնեն սեփական ամփոփիչ նախագիծը՝ հաշվի առնելով աշխատանքի համար անհրաժեշտ ու կարևոր բոլոր շրջափուլերը:

 

 

Մոդուլները

 

I տարի

 

• Մասնագիտական ներածություն
• Արվեստի պատմություն
• Նկարչություն 1
• Հայոց պատմություն/Տրամաբանություն
• Մասնագիտական գծագրություն և թվային գործիքակազմ
• Նկարչություն 2
• Ժամանակակից արվեստի և դիզայնի պատմություն
• Հաղորդակցություն 1

 

 

II տարի

 

• Բնապահպանություն և կայուն դիզայն
• Վերլուծական ճեպանկար
• Հաղորդակցություն 2
• Նյութեր, հանգույցներ և տեխնոլոգիա 1
• Նյութեր, հանգույցներ և տեխնոլոգիա 2
• Վիզուալ ներկայացման մեթոդներ և գործիքակազմ
• Եռաչափ թվային մոդելավորում և նախատիպ 1
• Դիզայն ստուդիա 1
• Կամընտրական դասընթացներ 1

 

 

III տարի

 

• Եռաչափ թվային մոդելավորում և նախատիպ 2
• Շուկայագիտության հիմունքները արդյունաբերական դիզայնում
• Միջոլորտային նախագիծ
• Բրենդավորում
• Նախագծի կառավարում
• Դիզայն ստուդիա 2
• Կամընտրական դասընթացներ 2
• Կամընտրական դասընթացներ 3

 

 

IV տարի

 

• Ակադեմիական գրագրություն և բարեվարքություն
• Ավարտական աշխատանքի նախապատրաստում
• Կամընտրական դասընթացներ 4
• Քաղ. պաշտպանություն/Փիլիսոփայություն
• Ավարտական ամփոփիչ աշխատանք

 

 

Կամընտրական դասընթացներ

 

Կրթական ծրագրի բոլոր ուսանողները ուսման երկրորդ տարվա երկրորդ կիսամյակից հնարավորություն ունեն ընտրելու մասնագիտական խորացված կամ հարակից ոլորտների դասընթացներ, որոնք կզարգացնեն ընդհանրական և ոլորտին հատուկ կարողություններն ու հմտությունները:

 

 

Ընդունելության պահանջները

 

«Արդյունաբերական դիզայն» բակալավրի կրթական ծրագրի ընդունելության պահանջներին և ընթացակարգին կարելի է ծանոթանալ այստեղ: